ភ្នំពេញ៖ រដ្ឋលេខាធិការក្រសួងសង្គមកិច្ច និងអគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា បានប្រកាសគាំទ្រចំពោះសាលាក្រមផ្តន្ទាទោសលោក កឹម សុខា នៅព្រឹកថ្ងៃទី៣ ខែមីនា ឆ្នាំ២០២៣នេះ ដោយថា ជាចម្លើយដ៏យុត្តិធម៌មួយដែលកម្ពុជាចង់បានជាយូរមកហើយ។

លោក ឯម ច័ន្ទមករា បានលើកឡើងផងដែរថាការកាត់ទោសលោក កឹម សុខា នៅថ្ងៃនេះក៏ជាការបង្ហាញដល់អ្នកដទៃទៀតថាការចូលរួមអនុវត្តន៍ផែនការសម្ងាត់ដើម្បីបំផ្លាញជាតិរបស់ខ្លួននោះនឹងទទួលលទ្ធផលមិនខុសពីលោក កឹម សុខា នោះទេ។

លោកថា៖ «ការឃុបឃិតគ្នាបរទេសផ្តួលរំលំរាជរដ្ឋាភិបាលស្របច្បាប់ តាមរយៈបដិវត្តពណ៌ ឬមធ្យោបាយខុសច្បាប់ គឺជាគ្រោះថ្នាក់ដ៏ធ្ងន់ធ្ងរបំផុតដែលនាំទៅដល់ការបំផ្លិចបំផ្លាញសន្តិភាពប្រទេស និងភាពសុខសាន្តរបស់ប្រជាជនកម្ពុជាដែលរកបានដោយលំបាកនេះ»។

គួរឱ្យដឹងថាតុលាការសាលាដំបូងរាជធានីភ្នំពេញនៅព្រឹកថ្ងៃទី៣ ខែមីនា ឆ្នាំ២០២៣នេះ បានសម្រេចផ្តន្ទាទោសលោក កឹម សុខា ដាក់ពន្ធនាគារចំនួន ២៧ឆ្នាំ ពីបទសន្ទិដ្ឋិភាពជាមួយបរទេស ឬឃុបឃិតត្រូវរ៉ូវជាមួយនឹងបរទេស និងបានដកសិទ្ធិជាស្ថាពរនូវសិទ្ធិនយោបាយរបស់លោក។ ទោះជាយ៉ាងណាលោកត្រូវបានអនុញ្ញាតឱ្យធ្វើការឃុំខ្លួននៅក្នុងផ្ទះជំនួសការបញ្ជូនទៅពន្ធនាគារ តែមិនអនុញ្ញាតឱ្យលោក កឹម សុខា ជួបភ្ញៀវណាម្នាក់នោះទេក្រៅពីសមាជិកគ្រួសារ លើកលែងតាំងមានការអនុញ្ញាតពីរាជអាជ្ញានៃសាលាដំបូងរាជធានីភ្នំពេញ៕